‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ติณมุฏฺฐิทายโก เถโร อิมา คาถาโย
อภาสิตฺถาติฯ
ติณมุฏฺฐิทายกตฺเถรสฺสาปทานํ ปฐมํฯ
2. มญฺจทายกตฺเถรอปทานํ
[13]
‘‘วิปสฺสิโน ภควโต, โลกเชฏฺฐสฺส ตาทิโน;
เอกมญฺจํ [เอกํ เวจฺจํ (สฺยา.), เอกปจฺฉํ (ปี.)] มยา ทินฺนํ, ปสนฺเนน สปาณินาฯ
[14]
‘‘หตฺถิยานํ อสฺสยานํ, ทิพฺพยานํ สมชฺฌคํ;
เตน มญฺจกทาเนน, ปตฺโตมฺหิ อาสวกฺขยํฯ
[15]
‘‘เอกนวุติโต กปฺเป, ยํ มญฺจมททิํ ตทา;
ทุคฺคติํ นาภิชานามิ, มญฺจทานสฺสิทํ ผลํฯ
[16]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[17]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[18]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มญฺจทายโก [เวจฺจกทายโก (สฺยา.), สทฺทสญฺญิกวคฺเคปิ อิทํ§อปทานํ ทิสฺสติ] เถโร อิมา คาถาโย อภาสิตฺถาติฯ
มญฺจทายกตฺเถรสฺสาปทานํ ทุติยํฯ
3. สรณคมนิยตฺเถรอปทานํ
[19]
‘‘อารุหิมฺห ตทา นาวํ, ภิกฺขุ จาชีวิโก จหํ;
นาวาย ภิชฺชมานาย, ภิกฺขุ เม สรณํ อทาฯ
[20]
‘‘เอกติํเส อิโต กปฺเป, ยํ โส เม สรณํ อทา;
ทุคฺคติํ นาภิชานามิ, สรณคมเน ผลํฯ
[21]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[22]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สรณคมนิโย เถโร อิมา คาถาโย
อภาสิตฺถาติฯ
สรณคมนิยตฺเถรสฺสาปทานํ ตติยํฯ
4. อพฺภญฺชนทายกตฺเถรอปทานํ
[24]
‘‘นคเร พนฺธุมติยา, ราชุยฺยาเน วสามหํ;
จมฺมวาสี ตทา อาสิํ, กมณฺฑลุธโร อหํฯ
[25]
‘‘อทฺทสํ วิมลํ พุทฺธํ, สยมฺภุํ อปราชิตํ;
ปธานํ ปหิตตฺตํ ตํ, ฌายิํ ฌานรตํ วสิํ [อิสิํ (สฺยา.)]ฯ
[26]
‘‘สพฺพกามสมิทฺธิญฺจ, โอฆติณฺณมนาสวํ;
ทิสฺวา ปสนฺโน สุมโน, อพฺภญฺชนมทาสหํฯ
[27]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, อพฺภญฺชนสฺสิทํ ผลํฯ
[28]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[29]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[30]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อพฺภญฺชนทายโก เถโร อิมา คาถาโย
อภาสิตฺถาติฯ
อพฺภญฺชนทายกตฺเถรสฺสาปทานํ จตุตฺถํฯ